Il Fond Svizzer per la Cuntrada fa part dal pachet da distgargia 27 dal Cussegl federal. Sche quel vegn acceptà, è il FSC a partir dal schaner 2027 fitg periclità.
En la pratica contribuescha il FSC dentant dapi decennis al mantegniment ed a la tgira da nossas cuntradas culturalas vitalas Quai mussa ina retschertga externa dals effects dals agids finanzials dal Fond Svizzer per la Cuntrada (FSC) ch'è vegnida incumbensada dal FSC.
Il rapport da la retschertga constatescha che il FSC vegn percepì sco sigil da qualitad cun in effect exemplaric:
Il rapport da la retschertga detaglià chattais Vus qua: Bericht FLS-Wirkungsanalyse (1.3 MB, pdf)
Andreas Aebi. President dal Fond Svizzer per la Cuntrada
Il Fond Svizzer per la Cuntrada (FSC) è dapi trais decennis in’istorgia da success. Per incumbensa da la Confederaziun, ma tuttina sin atgnas chommas, è il FSC sa sviluppà ad in center da cumpetenza per dumondas da la cuntrada. Il simpel access al sustegn finanzial dal FSC è fitg impurtant gist per las puras ed ils purs, als quals la cuntrada stat fitg a cor e che vulan s’engaschar per las valurs da nossas cuntradas culturalas natiralas, saja quai cun ina producziun persistenta u cun la tgira d’elements da la cuntrada tradiziunals. Savens decida questa purschida simpla e nunbirocratica davart la realisaziun d’in project per la cuntrada.
L’istorgia da success dal FSC pudess ussa dentant ir a fin a moda andetga. En il rom dal pachet da distgargia 27 pon circuls interessads s’exprimer actualmain davart la proposta dal Cussegl federal d’annullar las contribuziuns per il FSC a partir dal 2027. Uschia giess a perder in instrument da promoziun federal fitg efficazi ed apprezià – e quai a donn e cust da las bellezza cuntradas culturalas da la Svizra.
Cuminanzas da persunas engaschadas investeschan savens sur ils cunfins d’interess e da partida voluntarmain temp e daners per planisar e realisar projects persistents en favur da la cuntrada. Da quai profitain nus la finala tuttas e tuts. Quest engaschament voluntar è dentant mo pussaivel, sch’i dat era purschidas simplas e nunbirocraticas per finanziar projects per la tgira da la cuntrada. En quest connex ha il Fond Svizzer per la Cuntrada surpiglià ina rolla da pionier. El metta a disposiziun a moda pragmatica meds finanzials per planisar e realisar projects en favur da la cuntrada e gida persunas engaschadas da scriver istorgias da success per nossas cuntradas. Blers projects-mussavia chattais Vus en ils bulletins u sin la pagina-web dal FSC.
En vista a la gronda valur da nossas bellas cuntradas per la qualitad da viver, il turissem e la reputaziun da la Svizra fissi deplorabel, sch’ins mettess cun quest pitschen respargn ina fin al Fond Svizzer per la Cuntrada.
Scumonds e cumonds legals na tanschan betg per garantir la tgira da la cuntrada cultivada. Il FSC dat impuls finanzials per mesiras voluntaras a favur dal mantegniment tgira da cuntradas cultivadas natiralas. Quest princip promova la prontezza d’organisaziuns localas e regiunalas da daventar sezzas activas. El sustegna effects da sinergia en ils secturs da l’agricultura, dal turissem, da la construcziun e da l’artisanadi tradiziunal.
Cun sias contribuziuns finanzialas presta il FSC in agid economic regiunal apprezià ed effizient per crear lavur en regiuns economicamain disfavurisadas. Ils agids han in effect da multiplicaziun ed intimeschan savens investiders da s’engaschar bler dapli en questas regiuns. Blers projects han ina funcziun da model ed animeschan era auters da realisar in project.
Il Fond Svizzer per la Cuntrada (FSC) è in'instituziun fundada da la Confederaziun, però independenta da l'administraziun. Sin fundament dal dretg federal surpiglia la surveglianza l'autoritad electorala da la cumissiun dal FSC, damai il Cussegl federal. Cunter decisiuns da la cumissiun dal FSC pudevan ins appellar fin ils 31 da fanadur 2008 directamain al Cussegl federal; a partir dal 1. d'avust 2008 pon ins recurrer al Tribunal administrativ federal.
Il Cussegl federal designescha il president ed ils commembers da la cumissiun dal FSC. Dal rest sa constituescha la cumissiun sezza ed ella nominescha il secretariat. La cumissiun è in organ directiv da la Confederaziun. Ella ademplescha sias incumbensas sco cumissiun generala.
Ella è dividida en quatter comités spezials:
Ils dus comités da projects giuditgeschan las dumondas per ina contribuziun inoltradas e fan ina proposta per mauns da la cumissiun generala.
Tenor il reglament da l'organisaziun dal FSC prepara il secretariat las decisiuns da la cumissiun dal FSC. El ha il dretg da far propostas a la cumissiun ed als comités. El ha l'incumbensa da pregiuditgar las dumondas per agids finanzials. En pli controlla el cuntinuadamain il stadi dal tractament da las dumondas e la realisaziun dals projects sustegnids. Per mauns da la cumissiun e dals comités skizzescha el il concept dal fond, il budget, il quint ed ils rapports annuals ed infurmescha regularmain las medias. Il secretariat è dotà cun totalmain 490 pertschients da plazzas (incl. plazza a temp parzial per lavur da publicitad, per regla praticum).