Communicaziun a las medias (15-12-2023)
Invista e retrospectiva davart l'engaschament per cuntradas culturalas en accord cun la natira
Per ordinari è il bulletin dal FSC deditgà a projects promovids. Las cuntradas che vegnan uschia valurisadas stattan en il center. Ma questa giada ha il comité d'infurmaziun da la cumissiun dal FSC vulì metter en il center las collavuraturas ed ils collavuraturs dal post d'administraziun dal FSC e laschar scriver ellas ed els sezs: davart lur lavur professiunala e davart projects che meritan l'attenziun.
Davart la concessiun da contribuziuns a projects per tgirar e valurisar cuntradas culturalas en accord cun la natira decida la cumissiun dal Fond Svizzer per la Cuntrada (FSC) ch'il Cussegl federal ha dacurt elegì da nov per la perioda d'uffizi 2024-2027 (cf. boxa I). Preparadas e realisadas vegnan las decisiuns da la cumissiun dal FSC dal team dal post d'administraziun ch'è dotà cun stgars tschintg plazzas cumplainas. Sias collavuraturas e ses collavuraturs scientifics accumpognan la realisaziun da projects promovids e dattan en il pli nov bulletin dal FSC invista en lur lavur:
- Andreas Lack lauda la Rait natirala Pfannenstil (ZH) per sia lavur da pionier. «Igl è remartgabel ch'igl è gartegià a la rait natirala Pfannenstil da stgaffir sur ina lunga perioda ina plivalur extraordinaria per la natira, la cuntrada e la populaziun.»
- Nicole Käsermann scriva davart revalurisaziuns promovidas per l'Alpe Porcaresc (TI) e – cun in tschegn d'egl – era davart la satisfacziun d'avair contribuì in zic cun cussegls persunals a la producziun dal chaschiel da l'alp che vegn cumprà en la stizun dal vitg.
- Michel Bhend mussa ch'il project «Cuntrada natirala e culturala Natischerberg» (VS) è in project exemplaric integral che cumpiglia tut ils elements impurtants da la cuntrada culturala e che vul mantegnair u revalurisar quels.
- Antoine Giovannini descriva il basegn d'ina cuntrada satisfaschanta e singulara che commuventa nus grazia a sias particularitads, ses caracter e sia forza da s'identifitgar cun ella e co ch'il project innovativ «Jardin d'Eos» ad Eysins (VD) vul stgaffir da nov ina tala cuntrada.
Quai sajan «invistas che fan impressiun», scriva Bruno Vanoni, l'incumbensà per infurmaziun partint dal FSC en il «editorial». En sia retrospectiva da 17 onns lavur publica per il FSC fa el endament che quel saja in «unicat» e ch'el haja survegnì il mument da sia fundaziun a chaschun da la festa da 700 onns Confederaziun explicitamain l'incumbensa dad infurmar, sensibilisar e motivar da mantegnair e revalurisar cuntradas culturalas en accord cun la natira.
A la fin da la perioda d'uffizi da quatter onns en la cumissiun dal FSC guardan tschintg commembers partints enavos sin lur engaschament.
- Verena Diener (Winterthur), la presidenta partinta dal FSC è engraziaivla ch'ella ha pudì gidar ils ultims otg onns a proteger, furmar e sviluppar cuntradas bellas: «Dapi mia uffanza èn cuntradas che stgaffeschan relaziuns impurtantas per mai.»
- Hansjörg Hassler, il vicepresident partint dal FSC da Dardin (GR) appellescha al tractament conscienzius da las perlas natiralas che restan anc. Pertge: «Ina cuntrada culturala en accord cun la natira è in grond gudogn per l'entira populaziun.»
- Edwin Huwyler (Wilen b. Sarnen OW) sa legra da l'engaschament da blers onns per mirs sitgs da la vischnanca Engelberg. «A la vischnanca èsi gartegià da sensibilisar la populaziun ed ils proprietaris per il mantegniment dals mirs sitgs sco impurtants elements da la cuntrada.
- Regula Ott (Cuira) è engraziaivla per cuntradas bellas e fermas. «Qua poss jau respirar, giudair il mument e tancar energia. Ed en blers cas ha il FSC baud u tard gì en la detta.»
- Andreas Stadler (Berna) è persvas «ch'il FSC emprova ozendi da mantegnair il natiral ed er il tradiziunal en ina buna moda e maniera, il medem mument dentant era da scriver vinavant e da sustegnair sin la basa da quests elements ils process dal svilup agricul (persistent).»
Engraziament a la presidenta partinta dal FSC
Ch'il Parlament haja prolungà il 2021 il FSC en ses quart decenni, saja senza dubi d'engraziar en emprima lingia a l'engaschi grond ed inschignaivel da la presidenta dal FSC Verena Diener, scriva Hansjörg Hassler per il cumià da la presidenta dal FSC. Ella haja contribuì essenzialmain al fatg ch'il FSC haja puspè schlargià sia pratica da promoziun: il focus actual dal FSC, l'agroselvicultura e la tschertga cuntinuanta per novas propostas innovativas mussan quai.