Jau hai plaschair da mia nova incarica tar il Fond Svizzer per la Cuntrada e da pudair contribuir al mantegniment ed a la tgira da la cuntrada svizra – in bellezza patrimoni ch'i vala da mantegnair.

Sara Rudelli

Ils 27 da november 2025 ha il Cussegl federal elegì la Tessinaisa Sara Rudelli en la cumissiun dal Fond Svizzer per la Cuntrada. Ella entra en uffizi il 1. da schaner 2026 ed è elegida per la perioda d'uffizi currenta che dura fin ils 31 da december 2027. 

Sara Rudelli surpiglia il sez da Rachele Gadea Martini che sa retira pervia da la limitaziun dal temp d'uffizi per ils 31 da december 2025. Il Fond Svizzer per la Cuntrada engrazia da cor a Rachele Gadea Martini per ses grond engaschi en favur da las cuntradas culturalas natiralas en la Svizra Meridiunala durant ils ultims 12 onns. Il medem mument giavischain nus ad ella sco directura da la fundaziun Valle Bavona vinavant mo il meglier e bun success. 

Sara Rudelli ha studegià agronomia a la SPF/ETH a Turitg e lavura da preschent per il departament da finanzas e d'economia dal chantun Tessin sco collavuratura scientifica e spezialista per pajaments directs. La dunna da 51 onns è creschida si sin in bain puril a Castel San Pietro en la Valle di Muggio. Ella enconuscha ils temas che preoccupan las puras ed ils purs en il Tessin ed en general las sfidas dals umans che ston procurar per lur existenza en las vals per part perifericas dal Tessin.

La cumissiun ed il secretariat dal Fond Svizzer per la Cuntrada sa legran da collavurar cun Sara Rudelli e giavischan ad ella bun success e bler plaschair cun sia nova incumbensa.