Fonds Landschaft Schweiz (FLS) Fonds Suisse pour le Paysage (FSP) Fondo Svizzero per il Paesaggio (FSP) Fond Svizzer per la Cuntrada (FSC)

 

Avegnir - Il FSC po cuntinuar cun ses engaschament!

Cliccar qua per Diesch buns motivs per mantegnair il Fond Svizzer per la Cuntrada FSC e testimonianzas.

Communicaziun a las medias dal FSC (22.3.2019):

L'Assamblea federala ha prolungà las basas legalas fin l'onn 2031 e mess a disposiziun ulteriurs 50 milliuns francs

Il FSC po cuntinuar cun ses engaschament per cuntradas culturalas natiralas

Il Cussegl naziunal ed il Cussegl dals chantuns han ils 22 da mars 2019 definitivamain ditg GEA a la renovaziun dal Fond Svizzer per la Cuntrada. Il parlament ha uschia ignorà las objecziuns dal Cussegl federal. Quel n'ha per motivs da l'urden politic betg vulì cuntinuar cun il FSC. Per la perioda 2021-2031 èn vegnids concedids ulteriurs 50 miu. francs al FSC.

Las novas basas legalas dal FSC valan fin la mesadad dal 2031 (senza prolungaziun avess il FSC stuì smetter cun sias activitads da promoziun l'onn 2021). Il Cussegl dals chantuns è gia s'exprimì ils 13 da december 2018 senza cuntravuschs per la cuntinuaziun dal FSC ed ha concedì 50 milliuns francs per ils onns 2021 fin 2031. Il Cussegl naziunal è suandà quests conclus ils 11 da mars 2019 cun decisiuns da maioritad nunspetgadamain cleras. En las votaziuns finalas han ils dus cussegls confermà ils 22 da mars 2019 cun 43 cunter 1 (Cussegl dals chantuns) resp. 141 cunter 47 (Cussegl naziunal) vuschs da definitivamain renovar il FSC. (La prolungaziun dal FSC pudess bain anc vegnir cumbattida cun in referendum, ma sin fundament dal grond sustegn en il parlament n'èsi betg da quintar cun quest pass.)

Il FSC è vegni fundà a chaschun da la festa da 700 onns Confederaziun l'onn 1991 sco instrument da promoziun independent da l'administraziun. Grazia a las decisiuns actualas po il FSC cuntinuar cun ses engaschament il proxim decenni. Fin oz ha el pudì sustegnair en tut las regiuns dal pajais passa 2500 projects locals e regiunals per la tgira, la revalitaziun e la reconstituziun da cuntradas culturalas natiralas cun totalmain 150 milliuns francs.

Verena Diener, presidenta dal FSC: «incarica ed obligaziun»

Verena Diener, la presidenta dal FSC, è fitg levgiada dal consentiment confortabel dal parlament da cuntinuar cun il FSC – e cuntenta cun il bun attestat ch'il FSC ha survegnì per sias activitads d'enfin qua: en las discussiuns dal parlament sco er en la posiziun dal Cussegl federal (negativa mo per motivs da l'urden politic). «La stima per la lavur d'enfin qua menziunada diversas giadas signifitga per il FSC incarica ed obligaziun da chattar e promover vinavant respostas confurmas al temp a la dumonda co far diever da la cuntrada – ina resursa preziusa.» Spezialmain engraziaivla è la presidenta dal FSC a la Cumissiun per ambient, planisaziun dal territori ed energia dal Cussegl dals chantuns. Ella ha immediat tractà la proposta dal cusseglier dals chantuns Werner Luginbühl e procurà cun agid d'ina iniziativa da cumissiun unanima che la prolungaziun dal FSC è reussida.

Communicaziuns anteriurs:

Il Cussegl naziunal vul mantegnair il FSC per ulteriurs diesch onns!

Il Cussegl naziunal confermà ils 11.03.2019 da vulair finanziar diesch ulteriurs onns il Fond Svizzer per la Cuntrada.

Leger vinavant en tudestg / en franzos / en talian

La cumissiun dal Cussegl naziunal vul mantegnair il FSC

La cumissiun dal Cussegl naziunal confermà ils 18.02.2019 da vulair finanziar diesch ulteriurs onns il Fond Svizzer per la Cuntrada.

Leger vinavant en tudestg / en franzos / en talian


Il project per mantegnair il FSC è damai madir per vegnir discussiunà en il Cussegl dals chantuns

La cumissiun dal Cussegl dals chantuns conferma (anc ina giada) unanimamain da vulair finanziar il FSC

A chaschun da sia sesida dals 13 da november ha la Cumissiun per ambient, planisaziun dal territori ed energia dal Cussegl dals chantuns (CAPTE-CC) confermà unanimamain da vulair finanziar diesch ulteriurs onns il Fond Svizzer per la Cuntrada, malgrà ch'il Cussegl federal aveva fatg la proposta da refusar l'iniziativa da cumissiun correspundenta (vesair la communicaziun a las medias dals 7‑11‑2018 en tudesg, franzos e talian).

Il project è damai madir per vegnir discussiunà en il Cussegl dals chantuns. El è tractandà per gievgia, ils 13 da december. Suenter ina nova discussiun da la CAPTE dal Cussegl naziunal (CAPTE-CN) vegn il Cussegl naziunal la fin finala a decider il 2019 davart in'ulteriura finanziaziun dal FSC (suenter il termin fixà valaivel fin la mesadad dal 2021). Pervia dal frain a las expensas è necessari il consentiment da la maioritad da las commembras e dals commembers da tuts dus cussegls.


Communicaziun a las medias dals 12.01.2018:

La cumissiun dal Cussegl dals chantuns vul mantegnair il FSC per ulteriurs diesch onns

La Cumissiun per ambient, planisaziun dal territori ed energia dal Cussegl dals chantuns (CAPTE-C) giuditgescha a moda fitg positiva l'activitad da fin ussa dal Fond svizzer per la cuntrada (FSC). Ella ha perquai decidì d'inoltrar ina iniziativa parlamentara cun la finamira da finanziar quest fond ulteriurs diesch onns (2021–2031) e d'al dotar cun ina contribuziun federala da 50 milliuns francs.

La cumissiun ha decidì d'elavurar ina iniziativa cun l'intent da proveder il Fond svizzer per la cuntrada (FSC) ulteriurs diesch onns, quai vul dir dal 2021 fin il 2031, cun 50 milliuns francs. Il FSC è vegnì creà l'onn 1991 a chaschun dal giubileum da 700 onns Confederaziun sin fundament d'ina iniziativa parlamentara dals biros da tuttas duas chombras. Quest fond, concepì sco instrument independent da l'administraziun federala, sustegna finanzialmain projects per la tgira ed il mantegniment da cuntradas culturalas natiralas en l'entira Svizra. Suenter ch'igl era previs oriundamain d'al crear per la durada da diesch onns, è el vegnì prolungà duas giadas, fin il 2011 resp. fin il 2021. Cunquai che la bilantscha da la CAPTE-C davart l'activitad dal fond è danovamain fitg positiva, vuless ella prolungar il fond in'ulteriura giada cun in'iniziativa da cumissiun.

La cumissiun è sa radunada ils 11 e 12 da schaner 2018 sut il presidi dal cusseglier dals chantuns Roland Eberle (PPS/TG).


Communicaziun a las medias dals 10.04.2018:

La cumissiun dal Cussegl naziunal sustegna il mantegniment dal FSC

Il Fond svizzer per la cuntrada duai vegnir finanzià per ulteriurs 10 onns.

La Cumissiun per ambient, planisaziun dal territori ed energia dal Cussegl naziunal (CAPTE-N) ha examinà preliminarmain l'iniziativa 18.401 da sia cumissiun omologa che prevesa da prolungar per ulteriurs 10 onns la finanziaziun dal Fond svizzer per la cuntrada (FSC), creà a chaschun dal giubileum da 700 onns da la Confederaziun. Ella constatescha ch'ins haja pudì sustegnair grazia al FSC passa 2500 projects locals e regiunals che revaliteschan las cuntradas culturalas natiralas da la Svizra en vista a l'urbanisaziun progredinta. En ses egls presta quest fond independent ina lavur excellenta ed effizienta senza gronda birocrazia. La cumissiun renconuscha ch'i na va qua betg mo per aspects culturals ed emoziunals, mabain era per aspects economics ed ecologics. Ella è da l'opiniun ch'i saja impurtant che er ils chantuns e las vischnancas sa participeschian a quests projects e che las modalitads da la finanziaziun vegnian examinadas premurusamain. Ella propona, cun 18 cunter 7 vuschs, d'approvar l'iniziativa.

La cumissiun è sa radunada ils 10 d'avrigl 2018 sut il presidi dal cusseglier naziunal Roger Nordmann (PS, VD).

Sco proxim pass vegn uss la CAPTE-C a laschar elavurar in sboz per in conclus ed al suttametter al Cussegl federal per prender posiziun. Suenter in'ulteriura deliberaziun en la CAPTE-N decidan silsuenter il Cussegl dals chantuns ed il Cussegl naziunal definitivamain davart la prolungaziun dal FSC. 


Leger vinavant en tudestg / en franzos / en talian.

Decisiuns dal parlament