Fonds Landschaft Schweiz (FLS) Fonds Suisse pour le Paysage (FSP) Fondo Svizzero per il Paesaggio (FSP) Fond Svizzer per la Cuntrada (FSC)

Il Fond Svizzer per la Cuntrada FSC è vegnì fundà il 1991 a chaschun dal 700avel anniversari da la Confederaziun ed è vegnì dotà cun 50 milliuns francs. La finamira era da crear insatge da valur durabla a favur d’ina gronda part da la populaziun e damai da las proximas generaziuns. Il conclus federal davart ils agids finanzials è entrà en vigur il 1. d’avust 1991 ed era l’emprim limità enfin ils 31 da fanadur 2001.

Ils 23 da settember 1999 ha il parlament approvà ina prolungaziun dal conclus federal enfin ils 31 da fanadur 2011. Il fond è vegnì dotà danovamain cun 50 milliuns francs.

Ils 18 da zercladur 2010 ha il parlament approvà ina segunda prolungaziun per diesch onns fin la mesadad dal 2021, sco er ulteriurs 50 milliuns francs.

L'Assamblea federala ha prolungà las basas legalas fin l'onn 2031 e mess a disposiziun ulteriurs 50 milliuns francs.

Var 219 projects ha il FSC pudì sustegnair ils ultims dus onns e quai cun totalmain 8,6 milliuns francs. Questas cifras resortan dal rapport da lavur 2015/2016 (Bulletin - Bolletino 55).

Scumonds e cumonds legals na tanschan betg per garantir la tgira da la cuntrada cultivada. Il FSC dat impuls finanzials per mesiras voluntaras a favur dal mantegniment e da la restauraziun da cuntradas e da monuments natirals e culturals. Quest princip promova la prontezza d’organisaziuns localas e regiunalas da daventar sezzas activas. El sustegna effects da sinergia en ils secturs da l’agricultura, dal turissem, da la construcziun e da l’artisanadi tradiziunal.

Cun sias contribuziuns finanzialas presta il FSC in agid economic regiunal apprezià ed effizient per crear lavur en regiuns economicamain disfavurisadas. Ils agids han in effect da multiplicaziun ed intimeschan savens investiders da s’engaschar bler dapli en questas regiuns. Blers projects han ina funcziun da model ed animeschan era auters da realisar in project. 

Il Fond Svizzer per la Cuntrada (FSC) è in'instituziun fundada da la Confederaziun, però independenta da l'administraziun. Sin fundament dal conclus federal surpiglia la surveglianza l'autoritad electorala da la cumissiun dal FSC, damai il Cussegl federal. Cunter decisiuns da la cumissiun dal FSC pudevan ins appellar fin ils 31 da fanadur 2008 directamain al Cussegl federal; a partir dal 1. d'avust 2008 pon ins recurrer al Tribunal administrativ federal.

Il Cussegl federal designescha il president ed ils commembers da la cumissiun dal FSC. Dal rest sa constituescha la cumissiun sezza ed ella nominescha il secretariat. La cumissiun è in organ directiv da la Confederaziun. Ella ademplescha sias incumbensas sco cumissiun generala.

Ella è dividida en quatter comités spezials:

• comité da projects 1 (P1)
• comité da projects 2 (P2)
• comité per infurmaziun, relaziuns publicas e documentaziun (Info)
• comité per administraziun e finanzas (A+F)

Ils dus comités da projects giuditgeschan las dumondas per ina contribuziun inoltradas e fan ina proposta per mauns da la cumissiun generala.

Contact

Tenor il reglament da l'organisaziun dal FSC prepara il secretariat las decisiuns da la cumissiun dal FSC. El ha il dretg da far propostas a la cumissiun ed als comités. El ha l'incumbensa da pregiuditgar las dumondas per agids finanzials. En pli controlla el cuntinuadamain il stadi dal tractament da las dumondas e la realisaziun dals projects sustegnids. Per mauns da la cumissiun e dals comités skizzescha el il concept dal fond, il budget, il quint ed ils rapports annuals ed infurmescha regularmain las medias. Il secretariat è dotà cun totalmain 465 pertschients da plazzas (plus plazza parziala da praticum).

Contact